KIO hte Myen asuya datkasa ni May 28, 2013 ya hta Myitkyina mare Manau wang kaw bai hkrum zup bawngban na hkyen nga ma ai lam na chye lu ai, ndai lang na bawngban hpawng hta gaw US, UN, UK, Japan hte Miwa datkasa ni mung sakse hku shang lawm na re lam na chye lu ai.

Ndai lang gaw lahkawng maga na hpyendap ni htawt sit shara jahkrat na hte seng nna akri akrai bawngban na hte hpyen majan manghkang maram masam Komiti san da na hte seng nna madung bawngban na re lam maram chye lu ai. 

Laiza makau Namsan Yang mare makau Dumbang Bum kaw du nga ai myen asuya dap ni gaw ya yang "Mya Ku Twe" kungmani hte pawng nna Namsan Yang Lisu Hkalup Hpung Nawku jawng wang kaw aging agang ja htu sha nga ai lam na chye lu ai. Dai Namsan yang mare gaw maning majan grai laja wa ai ten kaw nna mare masha ni yawng shakram kau da ai mare re. Mare masha nnga mat ai hpang myen dap ni gaw mung masha ni a dum nta hte gat seng ni hpe adup hpaw nna kaja ai arung arai ni yawng shaw la mat ai sha n-ga, mare ting ngu na mung masha dum nta ni hpe mung wan nat jahten kau ya ai re lam na chye lu ai. 

Ma chyai chyai ai zawn byin taw nga ai myen mung a ka manawt shamu shamawt ai Democracy mung masa numshawn hkrang gaw Bawnu nhpring ai Manya kaba langai a hpang e hkan marawn garu nang ai lagang wunawng hpung kaba zawn byin nga ai. Dai zawn re hpung kaw mung up daru ahkang aya lu ai ni du hpunhtum hpai nang ai gaw mau hpa tsun hpa nre dasang galaw nga ai re. Sin na langji shan hpraw ni, yupsu yupma byin nang taw nga ai kaw lam kaba langai masa kaba langai magra jum kau ra sai. 

Myen a galoi mung masu taw nga ai ga si ni hte kalang naw shadun mayu ai. Htaw htaw lagat hpun kaba langai mi kaw chyahkyi kagat lung wa nga ai htaw! nga tsun marawn taw nga ai hpe [ya gaw ¦ya gaw kanang ta?]nga kam mara  yau nang ai ni mung naw nga chye ai dai gaw mau hpa nre, dai kaw annau ni nchya pa nang na grai ahkyak ai. Myen arawng mala gawngba masu ai hpe nmai mau nang sai. Bai, shingdu kaw sinat madi nna bawngban ga ngu ai hpe mung nmai sharawng ai. Dai ni ndai ten hkyak hkyak annau ni manu kaba jum tawn yang masa kaba langai gayin wa na masa pru ai ngu mu ai, bawngban ga ngu ai hta kaning re lamang hku kara masa hku annau ni tsun tawn sai ga hte maren kadai lapran SLg ni lawm na, hpa ga baw hte bawng na, kaning re tara masa kaw myen de na masha kaba kadai ni lawm na ngu ai hpe bawngban ga ngu ai saw shaga laika kaw mungkan na hkra asan shawng ndau ra ai. Majoi gwi sa gwi wag gaw nmai ai manu sari hpa mat na. Sadi Dai zawn mung masa grai nbawngban yang ndai ni hpe kaja nan ndau shabra ra ai. Shada hkungga ai ningsam shapraw teng yang,

1- Mungkan de simsa  lam ndau shabra ra ai.

2- Kasu kabrawng hpung ngu ai hpe asan ndau shaprai Kau ra ai.[ dai rai yang she myen a mahku mara sa ai lachyum pru na re ]

3- UN/US/UK/EU/Asein/Japan/Miwa the simsa lam tam hpung ni,myu shayi hpung shiga dap/Media hpung ni yawng hpe zahpawng kaw shang lawm ya na ndau ra ai.

4- Majan hte htu tawn ai hpyen masa yawng hpe shazim tawn ra ai.[ shaloi she shada mahku mara hkungga ai lachyum pru ai.]

Lahta de na lamang ni hpe masing hkrang shapraw ai lam nnga yang annau ni sari sadang the hkrat madu ting- nyang hta hkrat sari sadang kaba the dung ningngai dan ra ai.Majoi wau taw nga ai npan na gwi daw hpe wau shagu ahkyak nmai  sai.masing masa tara ritkawp hkrat re nmu yang annau ni majoi nmai shamu ya sai.le de nga yang raw raw,waw de nga yang brawng brawng nga ai hta annau ni nmai chyapa nang sai.machyi tim thing grum kata hkam jan kau nna,sari mi alu dahpran ngun madun nga ga.hpang jahtum na jamjau majan she rai nu ga.shara mi matu dim ai kaw du htu malawng kau ra saga ai.mung masa numshawn hta hkyen masa hpe dahpran ngang ngang dahpran tawn nna,gwi waw shagu nrawt ga.nying jahkrit shagu hkrit ai baw ten nrai sai.myen a jahkrit shama sha ai hkam mana ai kawng pyi tu ten du saga ai.hkam jan lu saga ai,tsu machyi dik ai teng man ngun chyawm galung nna rau sha htu hkindit malawng kau saga.nang ngai annau ni yawng a ngun gaw ja kaba dik ai ten du nga ai wangan ngun rai taw nga ai ten hkindit matsut htawng shapraw kau ra sai. 

Ndai ten hkyak hkyak annau ni a uhpung uhpawng yawng KIO/KIA/KDA/NDAK/SLg Hkun Myet hpung/Lasang Awng hpung/Tanggu Dang hpung/Du Mun hpung the myu sha simsa dat kasa/Nu Num hpung Myu sha kata na hpung/ KBC/sara kaba ni/maigan du myu sha uhpung ni/Miwa mung/kala mung nga ai myu sha yawng galung hpawng de lu hkra the myu sha yawng a mabyin mayak manghkang yawng hpe yawng mai hkrum ai mungdan shara ra kaw lawan hkrum zup na mahtai kaja langai tam ra sai ngu mu ai bawngban ra shaga ai.nang shoi nang sha nga tinggyen myit hpe tawn kau nna hpang na annau ni a kashu kasha ni a myi man hpe tau ra sai.dai ni na annau ni lamu ga hta myen a shinggyin ahkaw ahkang tawt lai ai mabyin yawng hpe UN de tang ai zawn myen asuya hpang de mung tang ra ai.

Yawng ra ai mahtai lam langai de chyurum ai myu sha annauni rau htu malawng kau ra saga .

Myu sha yawng hpe hkungga ai.

Baren Numraw 1;15 pm 03-04-2013/ 

1. Ngai tsaw Chyinghkai, hpan jaw ai,

Laiza makau Nalung hte Namsan mare de mung myen asuya dap ni hpyen mawdaw (22) ram hte daihpawt May 8, 2013 ya 5:30AM daram hta du shang wa ai hpang Shada maga de mung Mawdaw (20) bai kahtap du ai lam na chye lu ai. Gangdau Yang de mung myen asuya dap ni mana maka du taw nga sai lam na chye lu ai, hpyen gumra ni mung (300) daram du nga sai lam na chye lu ai. Myen asuya dap ni a kata shaim lam shiga hku nga yang ndai laman Jinghpaw mung de majan masing kaba langai galaw hkyen ai nga nna shiga brawng nga ai re.

Lahta sam mung Namhkam mare Makau kaw dani May 9, 2013 hta Namhkam mare hta daju ai myen  asuya dap ni hte SSA dingda daw sam dap ni hte daihpawt jau jau 5:00AM ten kaw na ya shiga mara ai ten shana daw 8:00PM du hkra shani ting laja lana gasat hkat nga ai lam na chye lu ai. Majan poi a majaw Namhkam mare masha ni kadai mung shinggan npru ai sha nta kata kaw hkrai hkrit let makoi nga ai hte mare masha nkau gaw Muze maga de hprawng yen mat ai lam mung na chye lu ai. Majan poi gaw matut manoi aging aging naw gasat nga ai lam na chye lu ai. 

Jinghpaw mung hte Sam mung dingdung KIA ginra gasat poi ni de lawu myen mung de na sa tawn ai myen hpyen n-gun gaw myen hpyen dap n-gun yawng a htam (3) kaw na htam (2) tup re lam na chye lu ai. Malawng maga gaw lawu myen mung de na rai nna hpyen gasat mahkrum madup nau nnga ai ni law malawng re lam hte asak nhpring ai ma hpyenla grai law ai lam na chye lu ai. Myen mung Mandalay myen hkawhkam wang (chyung) kaw daju ai myen hpyen dap ni mung malawng maga ngu na Jinghpaw mung hte sam mung majan de rawt mat ai majaw ya yang Hkawhkam wang kata kaw myen hpyenla nnga mat ai majaw pyada (balik) ni she hkawhkam wang sa sin ya nga ai re lam Mandalay buga masha ni kawn na chye lu ai. Lawu myen mung de myen hpyenla she nmu mat hkra Jinghpaw mung hte Sam mung majan de rawt ai re lam na chye lu ai.

Myen asuya dap ni Myitkyina Laiza lam hpe dai ni (April 29, 2013) ya hta lai wa lai sa hkawm sa hkawm wa pat kau sai lam na chye lu ai, kade ya galoi du hkra pat na re hpe hkrak nchye shi tim, hpaga la ni tsun yang masum ya sha gan pat na re lam na chye lu ai. Hpa baw majaw, hpa yaw shada lam a majaw pat ai re hpe tup hkrak nchye lu tim myen asuya dap ni Manmaw Myitkyina lam lapran hpyen bai shamu shamawt hkyen ai majaw rai na re nga nna Laiza buga masha ni maram tsun nga ma ai. Bai Miwa mung de na ginchyau si hte langu si htaw ai Miwa mawdaw kaba ni hpe mung pru shang pat kau sai re lam na chye lu ai.

Ya yang Pangwa ginra de htu tawn ai myen asuya dap hpyen n-gun ni mung Myitkyina Waimaw maga de shani shagu ngu na nhtang yu wa nga ai lam na chye lu ai, shara mi de bai htu na matu hpyen n-gun kahkyin ai rai na re nga nna Waimaw Myitkyina buga masha ni tsun maram nga ma ai lam na chye lu ai. 

Lai wa sai 2013 ning April (26) ya shani kaang 12:00Noon ten Myitkyina Ginwang Lidu lam mayan Wara Zup mare kahtawng ni hta Sharaw wan hkru hkrawn wa ai kaw nna dum nta ni (48) daram hkru mat ai lam buga masha ni shana wa ma ai. Ya ten ginhtawng re majaw Jinghpaw mungdaw kata Myen hpyen la ni gaw hkrit ai majaw shara shagu wan sharaw nat dingyang re lam mung na chye lu ai.

Laiza makau mayan hkan du nga ai myen asuya dap ni mung shani shagu ngu na sharaw wan nat hkawm nga ai lam na chye lu ai. Laiza makau mayan kaw du shara la nga ai myen asuya dap ni gaw lam amyu myu hku nna KIA dap ni hpe jahte tam nga ai lam na chye lu ai. Myitkyina lam ntsa Namsan Yang hte Gangdau Yang mare hkan mung myen asuya dap hpyen n-gun grai law du nga ai lam na chye lu ai.

 KIA masat (4) Dap Ba dap dung (17) ginra KIA Manau Bum hpyen dap hpe (April 21, 2013) ya shani myen asuya dap ni masum ya ngu na matut manoi n-gun kaba hte htim gasat wa ai majaw yen kau ya sai lam na chye lu ai. Myen asuya dap hpyen n-gun (500) jan hte Laknak kaba myawk ni nsim nsa gap sharu bun ai majaw tinang KIA dap ni yen kau ra mat ai re lam na chye lu ai. KIA Dap dung (17) Manau Bum hpyen dap hpe yen kau sai rai tim tinang KIA dap ni hku nna mai byin ai ladat hte htim gasat shang wa nga ai myen dap ni hpe matut manoi gasat shingla nga dingyang re lam na chye lu ai. 

 Myen asuya dap ni gaw laiwa sai January shata 2013 ya du hkra KIA hpe hpyen gasat jet nbungli ni hte laja lana htim gasat ai hpang shata (2) jan ngu na dai hpyen gasat jet ngungli ni hpe Jinghpaw mung kaw nmu mada mat sai re. Rai tim shata lahkawng na ai hpang ya kalang bai Jinghpaw mung myitkyina mare de hpyen gasat jet nbungli ni bai du taw nga sai lam na chye lu ai.

April 26, 2013 ya shani sha lawu myen mung de na hpyen gasat jet fighter nbungli (8) gaw Myitkyina mare hpyen ngungli daru de bai du nga sai lam na chye lu ai. Hpa baw a matu Jinghpaw mung de ndai ram law ai hpyen gasat jet nbungli ni hpe sa tawn ai lam hpe tup hkrak nchye lu tim myen hpyen dap shiga lawk hku nga yang myen asuya dap ni Jingpaw mung de hpyen majan masing kaba langai bai waw na matu grai hpyen lajang nga ai lam na chye lu ai. 

Ya yang Laiza hte Myitkyina lapran hkawm sa hkawm wa masha ni shani shagu 100 lam nga ai ram tim motor cycle (Miwa hpri gumra) ni hte she law malawng hkawm sa hkam wa galaw nga ai lam na chye lu ai. Lam lapran hkan shara la sin kawp nga ai myen asuya dap ni mung ndai laman gaw grai myit kaja dan masu nga ai lam na chye lu ai, laiwa laisa mung masha ni hpe hkap jahkring tim san jep ai lam n-galaw ai sha n-ga malu masha hte hka ni hte hkap hkalum hkap daw rai nga ai lam na chye lu ai.

Mung masha nkau tsun ai gaw, "ya na zawn myen ni myit kaja dan masu ai gaw grai kam na gaw nrai na re, mung masa amyat tam ai sha rai na re" nga nna tsun maram nga ma ai. Laiza hte Myitkyina mawdaw lam lapran ndai laman gasat gala lam gan zim nga ai rai tim KIA masat (4) Dap Ba hte masat (3) Dap ba ni hta gaw shani shagu ngu na gasat poi ni naw byin nga ai re. Dai majaw Myitkyina hte Laiza lam lapran mung kade nna yang gasat poi ni bai byin wa na hpe mung masha ni grai tsang nga ma ai lam na chye lu ai.

Rai tim Laiza makau grupyin hte Myitkyina lam lapran myen dap ni gaw ya yang mi na nga ai hpyen n-gun hta htam lahkang grau jat da ai sha n-ga machyu pala laknak ni hpe mung grai jahting tawn da ngut sai lam na chye lu ai.   

Sammung dingdung Dap ba 4 npu dung 34 kata Kangming Bum hta daini hte rai yang 4 ya ngu na laja lana gasat poi byin taw nga ai lam chye lu ai. Dung 34 na KIA myu tsaw share ninghkring ni hte Thein Sein Myen dap- Kunlung, Sinli, Kutkai PyiTuSit ni pawng hpawn nna sa htip gasat ai re lam hte ndai gasat poi hta Myen dap ni laja lana machyi hkrum ai mat ai lam, Myen hpyenla marai 5 hprawng lawt pru wa ai majaw gaya pawt pawt nga ma ai lam shiga na chye lu ai.

Laika Masat: 003/KNO (Thai) 2013.

Ninghtoi : :2013ning April Shata ( 18 ) ya.

Amyusha hkrumzup bawngban hpawng hte seng nna

Thailand (KNO) a n dau shabra laika

Thailand mungdan Banmai Samahki (Jinghpaw) Mare e JinghpawWunpawng Amyusha ni a zup ra hkrumzup ai bawngban hpawng langai hpe n htoi2013 April 15-16 hta (2) ya tup Karai kasang a chyeju hte kabu gara galaw la lu sai. N dai zup hpawng hpe Jinghpaw Wunpawng Amyu Sha Hpung, Kachin National Organization ( KNO-Thailand ) hku nna woi-awn galaw ai rai nna, Thai mungdan e shanu nga ai Jinghpaw Wunpawng Amyu Sha , Magam gun dingsa ni, hte kaga Jinghpaw Wunpawng Mungmasa uhpung ni shanglawm bawngban lawm sai.

N daizup hpawng hta madung hku nna bawngban la lu ai lam ni gaw, Jinghpaw Wunpawng Amyusha ni awmdawm shanglawt (Independence) lu nan lu ra ai lam hpe madung hku nna bawngban jahkrup la sai, hte n dai ga baw n pu e Jinghpaw Wunpawng Amyu sha ni gahkyin gumdin sa mat ga ngu ai lam ni hpe lu bawng la lu sai.Shanglawm bawngban lawm ai mungchying mungshawa ni yawng gaw awmdawm shanglawt lu nan lu ra ai hpe madi shadaw ma ai.

N dai zuphawng hta Jinghpaw Wunpawng Amyusha num-la, gumgai-dingla, mahkawn-shabrang (98) tup sa du bawngban lawm wa sai. Zuphpawng du mung shawa ni gaw April shata 22 ya shani KIO/KIA hte Myen Ausya Simsa lam Jahta Hpung ni hkrumzup na lam hte seng ai, 1994 kawn 2011 du hkra simsa lam la ai ten akyu nga ai lam akyu n nga ai lam ni, wunpawng amyusha ni akyu hpyi yang gara mungmasa pandung hpe hpyi na lam ni, amyusha ni hpe woi-awn na ningbaw ningla langai hta kaning re ai myit jasat ni rawng ra ai lam ni, hpe group hte group garan nna bawngban htai lai jahkrup la lu sai.

Jahtum daw hta Jinghpaw Wunpawng sha ni awmdawm shanglawt lu wa u ga, ngu yawng rawt tsap marawn ai hte zuphpawng shangut akyuhpyi nna bawngban hpawng hpe awngdang ai hte shangut la lu sai.

Matut mahkai:

+ (66) 872016257

Slg. Kareng Hkawng Hawng (Ningbaw)

Jinghpaw Wunpawng Amyu Sha Hpung ( KNO Thailand