Posts categorized as "myutsawkasa.blogbaker.com"

Uru Seng Maw Ginwang KIA Dap Dung (6) Ginra Hta Majan Bai Byin Hpang Sai

1779684_656404194418894_138245303_n.jpgLai wa sai (July 16, 2914) ya shani 9:00am ten ram hta Jinghpaw Mung KIA Masat (2) Dap Ba npu Dap Dun (6) ginra Gwi Hka Ninghtawn hta tinang KIA MHH ni shara la nga ai de dap mying nchye shi ai Myen hpyen hpung langai gale pru wa ai majaw gasat poi laja lana byin ai lam shiga na chye lu ai.

Ndai gasat poi hta Myen dap maga na marai (1) si nna ram ram wa hkala hkrum mat ai lam shiga matut na chye lu ai, tinang KIA maga na hpa nra ai lam mung matut na chye lu ai.

Masat (2) Dap Ba Uru Seng Maw Ginwang KIA Dap Dung (6) ginra hta majan nbyin ai laning ni daram rai sai kaw nna ya bai byin hpang wa nga sai re lam na chye lu ai.

KIA Dap Dung (36) Ginra Kaw KIA MHH Ni Myen Dap Ni Hpe Bawm Hte Hkap Gasat, Myen (3) Ram Si Hkala Hkrum Mat

10268669_550973071685184_1313353853679089770_n.jpgLai wa sai July 14, 2014 ya shani 6:00am ten ram hta Lahta Sam Mung KIA Masat (4) Dap Ba npu Dap dun (36) ginra Hka Lum maga hku nna lung wa ai mying nchye shi ai myen tai hpyen hpung n-gun (60) ram hpe tinang KIA Dap Dung (36) na MHH Pawng hpawm hpyen hpung ni Hka Chyang Hkaraw kaw Nga Rung Bawm (1) hkap dem bun dat ai hta Myen dap maga na marai (1) si nna marai (2) ram hkala hkrum mat ai lam shiga na chye lu ai.

Myen Asuya Dap Ni K.I.A Hpyen Dap (2) Hpe Yen Ya Na Matu Jahkrit Shama Nga

10464362_337698253049426_327878402770584116_n.jpgLai wa sai July 9, 2014 ya shani K.I.A Masat (1) Dap Ba npu Dap Dung (7) ginra Sum Pyi Yang Kaw dung ai Myen asuya dap Hk.L.Y-(46) ni Sum Pyi Yang na Slg. La Shen hte Slg. U Hku Naw yen hpe rim la nna tinang KIA Dap Dung (7) Kung (3) na Lat Du N-gang Brang Shawng hpung ni shara la nga ai "Shing Kap Bum Post" hpe yen ya na matu hte N-yen ai rai yang gap di la na re ngu ndai salang yen hpe sa tsun shangun ai lam na chye lu ai.

July 9, 2014 ya shani 2:00pm ten ram hta Myen asuya dap Captain Kyaw Thun a nta kaw zuphpawng galaw ai hta K.I.A ni Shing Kap Bum N-yen jang gaw Pan Din Bum lam hku yu wa nna Hpau Wang Daru kaw Myen post bai wa dung na re lam shiga na chye lu ai.

Bai, July 9, 2014 ya shani sha K.I.A Masat (1) Dap Ba npu Dap Dung (7) ginra Hpung Chyan kaw nga ai Myen asuya dap Hk.L.Y-(46) ni Hpung Ing Yang mare na Slg.Nga Hkwi Naw hpe shaga la nna Hpung Ing Yang MHH Kung (1) Post hpe yen ya na matu hte N-yen ai rai yang Sumpra Bum na Hk.L.Y-(138) ni hte pawng nna sa gasat zing la na re ngu ndai salang wa hpe sa tsun shangun ai lam shiga na chye lu ai.

Myen asuya dap ni gaw ya yang K.I.A Shanglawt Hpyen dap nga ai shara shagu ni de hpyen shamu shamawt ai lam ni hpe grau grau galaw wa nna, K.I.A Dap ni hpe mai byin ai daram shagyip shagyeng jum tek kau lu hkra shakut nga ai re hpe asan sha mu mada lu nga ai, Ndai lam mung KIO/KIA hku nna Gap Hkat Jahkring ta masat lawan ka na matu dip n-gun jaw jahkrit shama ai lam re hpe asan sha mu chye lu nga ai.

July 11, 2014 Ya Shani Na Shiga Matut, Myen Dap Ni Shada Gap Hkat, Marai (20) Jan Hkala Mat

1902969_550973111685180_254534648375564419_n.jpgLai wa sai July 11, 2014 ya shani KIA Masat (4) Dap Ba npu Dap Dung (38) ginra Pang Sak hte Ke La Pa lapran kaw byin ai gasat poi hta myen asuya dap ni hkala nba law ai lam shiga na chye lu ai, gap hkat nga ai ten tinang KIA hpyen hpung ni mayun le mat wa ai hpang Myen asuya dap ni shanhte shada aging agang naw gap hkap taw nga ai majaw Myen dap maga na marai (20) jan hkala hkrum mat ai re lam na chye lu ai. Hkala hkrum mat ai Myen hpyenla ni hpe July 12, 2014 ya shani 2:00pm ten ram hta Nam Tau kaw wa hpai sa da nna Modo hte Lashio de bai htaw yu mat wa sai lam shiga na chye lu ai.

Si ai shiga tup hkrak nchye lu ai.

KIA Dap Dung (38) Ginra Ke La Pa Makau Kaw Gasat Poi Laja Lana Byin

984034_628545593892310_1407521374163315138_n.jpgJuly 11, 2014 ya shani jahpawt daw KIA Masat (4) Dap Ba, Dap Dung (38) ginra Loi Kang de nna Myen hpyen n-gun (60) ram, Mung ya de na hpyen n-gun (73) hpyen hpung ni 8:00am ten ram hta Pang Sak kaw hkrum hkat nna Ke La Pa maga de matut hkawm wa ai pawng hpawm hpyen hpung hte tinang KIA Dap Dung (38) na Hpyen hpung ni Ke La Pa makau kaw 3:00pm ten kaw nna 4:00pm ten du hkra gasat poi byin ai lam shiga na chye lu ai. Dai hpang jahkring mi zim nna 6:30pm ten ram kaw nna kalang bai gasat poi matut byin ai lam shiga na chye lu ai. 

Ndai gasat poi hta lahkawng maga na si hkala shiga tup hkrak nchye lu shi ai rai tim, myen dap maga na ram ram wa machyi hkrum nga sai lam shiga matut na chye lu ai.

Myen Asuya Dap Ni Lai Wa Lai Sa Mung Masha Ni Hpe Jahkrit Shama, Myitkyina-Laiza Lam, Myitkyina-Danai lam, Myitkyina-Hpakant Lam Ni Hpe Pat Kau

July 11, 2014 ya shani 3:00pm ten ram hta Laiza Makau Nam San Yang kaw dung ai Myen asuya dap ni gaw Laiza de na Myitkyina de wa na matu Cycle Carry ni hte Lai wa ai Mung masha ni hte laja lana hta kajet jahkrit shama ai sha n-ga Mung Chying masat yawng hpe mung la kau ya nhtawng Carry La ni a Cycle zaw ni hpe mung la kau ya ai lam shiga na chye lu ai. Bai, Mung Chying masat la kau ya hkrum ai mung masha ni hku nna laja lana aging agang tawng ban ai majaw Mung chying masat nkau hpe bai jaw ai lam na chye lu ai.

Ya yang Laiza Myitkyina lam hpe Myen asuya dap ni hku nna tsep kawp pat tawng ai rai nna Myitkyina-Danai lam, Myitkyina-Hpakant lam ni hpe mung July 10, 2014 ya shani kaw nna tsep kawp pat kau sai lam shiga na chye lu ai. Ya na zawn myen asuya dap ni hku nna Jinghpaw Mung kata lai wa lai sa lam ni hpe pat shingdang ai lam gaw KIO/KIA hpe shagyip shagyen, shakyet mayu ai majaw rai na re nga nna Laiza Buga masha ni tsun kajai nga ma ai.

KIA Dap Dung (34) Ginra Kaw TNLA Hte Myen Dap Ni Gasat Poi Byin

10351101_253579858162523_7057822983765668838_n.jpgJuly 9, 2014 ya shani 11:00am ten kaw nna 4:00pm ten ram du hkra lahta Sam Mung KIA Masat (4) Dap Ba npu Dap Dung (34) ginra Kawng Sak hte Bang Lun lapran kaw Myen asuya dap Tat-M-(77) npu na dap ni hte TNLA Balawng Dap ni laja lana gasat poi byin ai lam shiga na chye lu ai. 

Ndai gasat poi hta lahkawng maga na si hkala shiga tup hkrak nchye lu shi ai rai tim Myen asuya dap maga na ram ram wa hkala nba machyi hkrum mat ai lam shiga na chye lu ai.

Maija Yang Pa Kahtawng Hpyen Yen Dabang Hta Kan Ana Grai Sawng Nga

DSCN4813.JPGYa yang KIA masat (3) Dap Ba Sinpraw Ginwang Ginjaw Maija Yang Pa Kahtawng Hpyen Yen dabang hta Ma kaji, gumgai dginla ni Kan Ana, Kan machyi mase ai lam laja lana byin hkrum hkra nga ai lam shiga na chye lu ai.

KIA Dap Dung (27) Pung Ling Kaw Gasat Poi Byin

300376_277966052316124_1191692641_n.jpgJuly 8, 2014 ya shani 2:00pm ten ram hta KIA Masat (3) Dap Ba npu Dap Dung (27) ginra Hka Hkye kaw nga ai Myen dap Hk.L.Y-(83), Hk.M.Y-(418) pawng hpawm hpyen hpung ni tinang KIA ni nga ai Pung Ling de lung wa ai majaw tinang KIA MHH ni hte ang katut gasat poi byin ai lam na chye lu ai. Dai hpang Myen tai hpyen ni Hka Hkye de bai nhtang yu mat wa sai lam shiga matut na chye lu ai.

Ndai gasat hta lahkawng maga na si hkala shiga tup hkrak nchye lu shi ai.

Myen Dap Ni KBC Jawng Wang De Sinant Kaba Gap Bang

10378278_635350246558268_7647025665188768844_n.jpgJuly 8, 2014 ya shani 5:30pm ten ram hta KIA Masat (3) Dap Ba npu Dap Dung (27) ginra Mung Hkawng kaw dung ai Myen asuya dap Hk.M.Y-(318) dap ni Mung Hkawng KBC Hkalup Hpung Jawng Wang hpyen yen dabang de sinant kaba 60mm (1) lang gap bang dat ai majaw Wang kata na ginsum (3) kaw hkra nna hten za mat ai lam nga, masha gaw hka shin sa mat ai ten ang ai majaw hpa nra ai lam shiga na chye lu ai.

Mung Masha Asak Nhpring Ai Jinghpaw Ma (2) Adup Sat Katut

Lai wa sai May 21, 2014 ya shani Jinghaw Mung KIA Masat (11) Dap Dung ginra Wa Awng mare shingdu kaw Myen salang U Kyaw Khaing a wut ju shara hta Wa Awng mare kaw shanu nga ai Salang labang Gam Mun a kasha "Naw Htoi" Asak (12) ning hte Salang Hpau Rawm Tu a kasha "Myu San Li" Asak (8) ning re yen hpe shanhte a lata htu leng makoi kau ya ai ngu nna gayat sat da ai hpe Amu hpaw na matu Balik dap de sa shawk ai ram tim Ahkyak nla ya ai majaw July 8, 2014 ya shani Myitkyina Ginwang "District" Rung de shana wa ai lam shiga na chye lu ai.

Myen Hpyen Dap A Kata Lam Shiga Ni

Jinghpaw Kasa Myen1 (16).jpgJuly 7, 2014 ya shani KIA masat (2) Dap Dung npu Dap Dung (6) ginra Hpakant Byoha Kawng kaw myen tai hpyen ni zuphpawng galaw ai hta KIA magam gun MHH, MKM, hte Salang Kaba ni hpe laja lana rim na matu Tat Ma Mho kawn matsun dat ai lam shiga na chye lu ai.

Ya yang lai sai bat hta Myen asuya dap de Nsin Shang mat wa ai Sam Amyu shayi sha KIA Du hpe Laiza makau Nam San Yang mare kaw dung ai Myen asuya dap ni hku nna Laiza Pru shang lam chyinghka kaw shadung tawn nna shani shagu Lai wa lai sa Laiza Pru shang masha ni hta KIA magam gun lawm nlawm atik anang sin yu shangun nga ai lam shiga na chye lu ai.

Taing Mho Thun Thun Naung Hte Hpung Ni K.I.A Hpe Laja Lana Gasat Na Matu Miwa Asuya Hte Wa Jahkrup, Miwa Ahkang Jaw Dat

1920184_621086041320886_7896689780222563253_n.jpglai wa sai July 4, 2014 ya shani Miwa Mung "Thin Chung" lai mat wa ai Jing hpaw mung M.P.Hk Dap Lit Hkam Taing Mho "Thun Thun Naung hte Dho Taing Mho lawm, S.Y Hp-G-1 hpung ni gaw Miwa Mung Thin Chung Mare hta Miwa Asuya Salang ni hte zuphpawng sa galaw ai hta K.I.A hpe gasat na matu wa jahkrup ai re lam K.I.A shiga lawk kawn na chye lu ai. 

Miwa Asuya hku nna mung myit hkrum ahkang jaw dat sai re lam matut na chye lu ai, Taing Mho Thun Thun Naung hte hpung ni July 6, 2014 ya shani Myitkyina de bai nhtang du wa sai lam shiga na chye lu ai, Dho Taing Mho gaw Pang Wa ginra "Hpri Maw" kaw ngam nga ta nna hpyen majan masing jahkrat nga ai lam na chye lu ai.

July 7, 2014 ya shani Waw Hkyung kaw nna machyu pala wa htaw la ai lam shiga na chye lu ai.

July 6-7, 2014 Ya Laman Na Myen Hpyen Shamu Shamawt Shiga Ni

10313064_640125596080733_3929330766215940598_n.jpgJuly 6, 2014 ya shani 6:00am ten ram hta Manmaw kaw nna Shwigu de lai yu mat wa ai Jinghpaw Mung Hkring Mang daju Lajawn Ngan Seng hpung ni 2:00pm ten ram hta Manmaw de bai nhtang du wa sai lam shiga na chye lu ai, July 8, 2014 ya shani Loi Je de bai sa du na re lam na chye lu ai.

July 7, 2014 ya shani lahta Sam Mung Kuthkai de na Myen hpyen Modo (7) hta malu masha arung arai htaw lung wa ai ni Muse makau (105) mile Myen dap kaw 6:00pm ten ram hta du shang wa sai lam shiga na chye lu ai. 

July 7, 2014 ya shani lahta Sam Mung Ku Kang hkran de na rap wa ai mying nchye ai myen tai hpyen hpung langai Man Kawng shang kau da nna Loi Wing maga rai mat wa sai lam shiga na chye lu ai.

July 6, 2014 ya shani 10:00am ten ram hta KIA Masat (2) Dap Ba npu Dap Dung (11) ginra Myitkyina M.P.Hk dap kaw nna yu wa ai myen hpyen Modo (6) n-gun (130) daram hte arung arai htaw nna Hk.M.Y-(390) dap de lai shang mat wa sai lam shiga na chye lu ai.

July 6, 2014 ya shani 5:20pm ten ram hta KIA Dap Dung (11) ginra de Sam Mung de nna lung wa ai Myen dap Hk.L.Y-(68) dap ni Modo (5) n-gun (100) daram gaw Jinghpaw Mung Sar Maw Hk.L.Y-(105) dap de du shang wa sai lam shiga na chye lu ai.

Ya yang Jinghpaw Mung de lahta Sam Mung maga de na Myen hpyen dap ni hpe bai kalut la nna sa taw nga sai la shiga na chye lu ai.

KIA Masat (27) Dap Dung Ginra Kaw Gasat Poi Byin

10277409_618086351617991_4456362550895057829_n.jpgJuly 4, 2014 ya shani 7:00pm ten ram hta KIA Masat (3) Dap Ba npu Dap Dung (27) ginra Ban Hkung Yang kaw nga ai Hk.M.Y-(416) hpyen hpung ni Maw Swi Hka rap nna Maw Swi mare de gale pru wa ai kaw KIA Dap Dung (12) na MHH ni hte hkrum katut gasat poi byin ai lam shiga na chye lu ai.

Ndai gasat poi hta lahkawng maga na si hkala shiga tup hkrak nchye lu shi ai.

KIA Masat (9) Dap Dung Ginra Nam Ngawn Kaw TNLA Hte Myen Dap Ni Gasat Poi Byin

10291775_337151503104101_7697000787255680024_n.jpgJuly 3, 2014 ya shani 12:30 pm ten ram hta Lahta Sam Mung KIA Masat (4) Dap Ba npu Masat (9) Dap Dung ginra Nam Ngawn Hkaraw kaw mying nchye shi ai Myen hpyen hpung ni hte TNLA Balawng dap ni gasat poi byin ai lam shiga na chye lu ai.

Ndai Gasat poi hta lahkawng maga na si hkala shiga tup hkrak nchye lu shi ai.

Theme: Fresh Print by BlogBaker. Powered by BlogBaker.