T.N.L.A Hte Myen Dap Ni Laja Lana Gasat

IMG_248839602923687.jpeg28/5/2015 ya shana de KIA Dung (8) ginra Hu Lwi Bum TNLA Dap ni shara la nga ai de Myen hpyen n-gun (100) ram hte htim lung wa ai majaw 2:00pm kaw na 4:40pm du hkra manu mana laja lana gasat poi byin ai lam shiga na chye lu ai.

Grai Hkrit Tsang Ra Ai Myen A Zai Ladat, Yawng Hte Seng Ai

2008-2009 ning hta Sri Lanka "Ti Ri Linka" Mungdan kaw N-gun ja dik ai Tamil Tiger rawt malan hpung hpe Sri Lanka Asuya kaw nna atsai sha gasat dang kau ai hpyen zai ladat hpaji hpe Myen Asuya gaw grai n-gun lu ai majaw sa hka ja la nna ya yang KIO/KIA hpe dai ladat hte maren masing kaba hte gasat hpang nga sai lam na chye lu ai. 

N-gun kaba ai Tamil Tiger Rawt Malan hpyen hpung ni hpe gasat shamyit lu na matu shaning (10) ram masing jahkrat nna galaw sa wa ai re lam, Sri Lanka Asuya gaw Tamil Tiger Rawt Malan ni hte ya sha ya sha gap hkat jahkring simsa lam bawng ban masu nna, Rawt Malan hpung ni a shara ni hpe yat yat shara la, shani kahtep mat wa, bawng ban dat, bai gasat dat, di nna yat yat shara la mat wa ai hpang yawng grup rai sai nga hte kalang lata myi di chyip n-gun La Ba hte htim gasat shamyit kau ai ladat hpe jai lang ai re lam na chye lu ai. 

Dai hte maren, ya yang Myen Asuya hte Hpyen dap jai lang nga ai hpyen zai ladat mung Sri Lanka Asuya a ladat hte maren sha rai nga ai hpe mu mada lu ai. Bawng ban dat, bai gap dat, rai lani hte lani yat yat rai K.I.A post ni hpe gasat zing mat wa, K.I.A Uphkang ginra ni de lani hte lani shani kahtep wa, shara la ma wa nga sai, KIO Ginjaw laiza makau grupyin mung Myen dap ni hkrai grup rai mat sai, dai gaw grai hkrit tsang ra ai masa rai nga sai law........K.I.A Hpyen dap hku nna tinang K.I.A ginra de lani hte lanai shani kahtep shang wa nga ai myen Asuya Dap ni hpe aten dep lawan ai hku gasat shachut kau ra sai......hpang hkrat mat yang nmai sai, grai tsang ra sai ngu mu mada ai law........

Ndai lam hpe shara shagu copy galaw la nna shacyam shabra sa wa ga........Tinang KIO/KIA Ningbaw ni hte ni kahtep ai ni mung hpaji jaw tang madun sa wa ga......yawng lit jawm la sa wa ga ngu lajin dat ai. 

Sawk Sagawn Tang Madun ai- (Myu Tsaw Kasa)

K.I.A Dap Dung (12) Kaw Matut Manoi Gasat, Majan Grai Laja Wa

24/ 5/ 2015 ya shani 10:00am ten kaw nna 1:40pm ten du hkra K.I.A Masat (3) Dap Ba, Masat (12) Dap Dung ginra, tinang KIA hpyen hpung ni shara la nga ai Woi Ju Bum hte Bum Sen Bum de myen dap Hk.L.Y-(56,142), Hk.M.Y-(601,321) pawng hpawm hpyen hpung n-gun (400) ram hte wa htim gasat ai majaw gasat poi laja lana byin ai lam shiga na chye lu ai. Myen dap ni hku nna sinat kaba hpan hkum hte n'sim n'sa, n'htum nni, matut manoi gap sharu bun nna hpyen man (2) hku nna wang htim gasat lung wa ai majaw tinang KIA ni dai Bum (2) hpe yen kau da sai re lam shiga na chye lu ai.

Myen Asuya dap ni shani shagu hpyen n-gun grau grau jat wa nga ai majaw, ya yang KIA Dap Dung (12, 27) ginra de myen hpyen n-gun (2000) ram du taw nga sai lam na chye lu ai. 

Myu tsaw Share Shagan Marai (4) Asak Ap Nawng

23/ 5/ 2015 ya shani na K.I.A Masat (12) Dap Dung ginra, Nam Lim Pa mare baw Zai Bru Hkyet gasat poi hta tinang K.I.A maga na Labang Htung Mai, Lahpai La Seng, Lahpai Zau Shan, Hpau Myang La Nu, ndai share shagan marai (4) gaw Mungdan hte Amyu sha ni a matu Asak ap-nawng mat sai lam shiga na chye lu ai.

Asak ap-nawng mat sai Myu Tsaw Share Shagan marai (4) hpe hkungga jaw shagrau masat masa galaw dat ga ai law.........

K.I.A Dap Dung (12) Kaw Matut Gasat Nga

23/ 5/ 2015 ya shani 8:00am ten daram hta K.I.A masat (12) Dap Dung ginra, Magyeng mare baw kaw Hk.L.Y-(56, 142) pawng hpawm hpyen hpung ni hte tinang K.I.A Dap Dung (1, 12) pawng hpawm hpyen hpung ni minute (15) daram gasat poi byin ai lam shiga na chye lu ai. lahkawng maga na si hkala shiga tup hkrak nchye lu shi ai.

Ya yang Myen Dap ni gaw K.I.A Dap Dung (1, 12, 27) ginra de shani shagu ngu na hpyen n-gun ni matut manoi jat nga dingyang re lam na chye lu ai. 

Tinang Ga Hpe Manu shadan Jai Lang Ga

Labau hku yu yang anhte Jinghpaw Wunpawng amyu ni a ga gaw Myen ga hta shawng grai jau kaw na nga nga sai re hpe mu chye lu ai, dai majaw Jinghpaw Wunpawng ni a ga gaw Myen ga hta grau nna asak kaba nna manu dan nga ai. Lawu Myen mung de na labau hta rawng ai "Pyo, Hkama" ngu ai amyu ni gaw shawng nnan jau jau kaw nna lawu mung de hkrat yu mat wa ai Jinghpaw Wunpawng amyu ni re lam mu chye lu ai. Dai majaw ya yang na lawu myen mung ginra ni gaw jinghpaw Wunpawng Amyu Sha ni a lamu ga ni she rai nga ai. Dai ni lang nga ai Myen ga "Bama Saga" mung "Pyo, Hkama" amyu ni kaw nna Myen ni hkoi shap gyin shalat la ai ga she rai nga ai.

Dai majaw "Kachin" ngu ai Jinghpaw Wunpawng amyu sha ni a ga gaw Myen ga a Kanu Gindai ga she rai nga ai, dai hpe yu yang Myen amyu ni gaw Wunpawng amyu ni hta grau nna grit nem ai amyu ni she rai nga ai. Dai majaw Myen ga hpe ga shakut ai Wunpawng sha ni ja ja myit yu ra sai, tinang amyu ga hpe she grau nna manu shadan hkungga la ra let jai lang sa wa ga ngu lajin dat ai law...... dai gaw amyu Kaba Myit Jasat nan rai nga ai........Myen ga shaga shakut ai Wunpawng Sha ni myit malai na matu shalai dat ai..........

K.I.A Masat (12) Dap Dung Ginra Na Majan Shiga Matut

20/ 5/ 2015 ya shani Manmaw, K.I.A Masat (12) Dap Dung ginra, Nam Linm Pa lawu, Shwi Gu Ginwang daw, Loi Ai Bum hte Pang Ding Bum lapra tinang KIA ni shara jahkrat da ai de Mying nchye shi ai myen hpyen hpung ni ni kahtep shang wa ai majaw jahpawt daw 8:00am kaw nna 11:40am ten du hkra laja lana gasat poi byin ai lam shiga na chye lu ai. Dai hpang, 11:50am ten daram hta Myen dap Jet Fighter nbungli (2) hte kahti galai rai Nudaw (2) lang 12:20pm ten du hkra Bom kaba ni wa jahkrat, jak sinat ni hte wa gap bun ai lam shiga na chye lu ai. Dai hpang 12:20pm ten kaw nna Numdaw kalang mi bai gasat poi byin hpang ai gaw shana de daw 3:40pm ten du hkra re lam na chye lu ai.

Ndai gasat poi hta Myen dap maga na arum ara rai si hkala jawng mat ai lam mung matut na chye lu ai, Myen Nbungli kaw nna jahkrat dat ai Nbungli Bom kaba (1) gaw shanhte Myen hpyen ni nga ai maga de wa hkrat bun ai majaw arum ara, ayai aya rai si hkala jawng mat ai lam na chye lu ai. 

K.I.A Masat (36, 38) Dap Dung Ginra Ni Hta Gasat Poi Byin

19/ 5/ 2015 ya shani 8:20am-8:40am lapran hta lahta Sam Mung K.I.A Masat (6) Dap Ba npu, Masat (38) Dap Dung ginra Hpawng Seng mare makau kaw dap mying nchye ai Myen hpyen ni shamu shamawt hkawm wa ai majaw tinang KIA Dung (38) Dap Dung Dung, Kung (1) hte MKM pawng hpawm hpyen hpung ni hkap shingla gasat ai gasat poi byin ai lam shiga na chye lu ai.

Bai, 19/ 5/ 2015 ya shani 10:00am ten grupyin hta lahta Sam Mung K.I.A Masat (36) Dap Dung ginra, Mung Gu mare makau Lawk (7) maga de shamau shamawt hkawm ai Myen hpyen ni hpe tinang KIA Dap Dung (38) ni Remote Bom (1) hkap adem bun dat ai hta Myen maga na marai (3) si nna marai (8) ram hkala hkrum mat ai lam shiga na chye lu ai. 

Ya Kalang Bai Shalai Kau Hkyen Sai

10675711_1578565219044993_139907980752347172_n.jpgMyen hpyen dap ni n-gun Hpungtun kaba hte Kokang dap ni hpe htim gasat ai hta (1) Hpyen N-gun grai ma mat sai, (2) Majan grai ba mat sai, (3) Laknak grai jai lang kau sai, (4) Gumhpraw grai ma mat sai, (5) Myit masa grai hkrat mat sai. Kokang hpyen dap post kaji langai lu zing la na matu Myen Gum hpraw Sen Hkying Kaba Ma ai, Masha Tsa kaba si hkala hkrum ra ai. Post kaba langai lu zing na matu Myen gumhpraw Sen Mun kahtap nna Ma ra ai, Masha hkying lam si hkam machyi hkam ra ai. Ma mat ai ja gumhpraw hte masha n-gun hpe bai yu yang lu zing ai Kokang post hte n'dan nga ai. Manu mana sum machyi kaba rai nga masai.

Ndai ginlam ni langai hpang langai hpe yu yang Myen gaw matut nna majan kaba bai hpaw na, hpang na nmai byin mat sai hpe mu mada lu ai, Gumhpraw N'gun, Masha N'gun ni bai tam mahkawng la ra sai. Ya na zawn rai yak hkak ginchyum chyat, n'chang daw sum machyi kaba hkrum nga ai ten hta Mungdan Rudi Rawt Malan hpung ni myit jahkrum la nna ndai Myen asuya hte hpyen dap hpe ma ja htim gasat zing kau nna Jet ai Munghpawm langai bai nnan kaw na woi hpang yang mai na re ngu mu mada ai.

Lai wa sai shaning (50) ning daram hta ya na zawn ahkaw ahkang kaja, ginjang kaja ni grai lang shalai kau sai, ya mung bai shalai kau na hkyen nga sai. "Principle Of Revolution" Rawt Malan Arawn Alai hte grai hpai shai wa nga ai, Shanglawt lu sai ni zawn zawn rai, pyi rai n-dung shi yang shawng latsawn ai Rawt Malan hpung ni hkrai rai wa nga ai hpe mu mada lu ai. UN, EU ni a "Pressure" hpe hkrai maja nga yang gaw galoi mung shanglawt lu sana n're; UN, EU ni a Pressure hpe hkrai ahkyak nau n'mai shatai ai, tinang a lam tinang she chye ai, tinang galaw la ra ai, shanhte n'galaw ya lu ai. Dai majaw ya yang na aten ginjang kaja hpe lawan wan ahkaw ahkang chye la ra nga ga ai, ya kalang bai shalai kau jang gaw prat tup Myen a mayam tai wa mai nga ai law...............

K.I.A Dap Dung (12) Ginra, Magyeng Mare Kaw Laja Lana Gasat, Tinang K.I.A Hpyen La (2) Asak Ap Nawng Mat

14/ 5/ 2015 ya shani 10:00am ten daram hta K.I.A Masat (3) Dap Ba, Masat (12) Dap Dun ginra, Nam Ling Pa makau "Magyeng" mare kaw nga ai Hk.L.Y-(142) ni hpe tinang K.I.A hpyen hpung ni sa htim gap ai kaw na gasat poi laja lana byin ai lam shiga na chye lu ai. Myen dap maga na si hkala law ai hpe na chye lu ai. Gasat poi hta tinang KIA dap maga na Hpyen ma "Labya La Awng" hte Hpyen ma "Zahkung La Mai" yen myu hte Mungdan a matu asak ap nawng mat sai lam shiga matut na chye lu ai. 

KIA Dap Dung (36), Mung Lung, Nam Hkye Haw kaw Laja Lana Gasat

14/ 5/ 2015 ya shani lahta Sam Mung K.I.A Masat (6) Dap Ba, Masat (36) Dap Dung ginra, Mung Lung, kawng Gwi mare na "Nam Hkye Haw" ngu ai shara kaw mying nchye shi ai Myen dap hpyen hpung hte tinang K.I.A Dap Dung (29) ni gasat poi laja lana byin ai lam shiga na chye lu ai. Gasat poi hta lahkawng maga na si hkala shiga tup hkrak rai nchye lu shi ai.

T.N.L.A Dap Ni Kuthkai Myen Dap Sa Gap

14/ 5/ 2015 ya shani 5:00pm ten daram hta lahta Sam Mung K.I.A Masat (9) Dap Dung ginra, Kuthkai Myen dap hpe T.N.L.A myit rum Balawng Dap ni Dap Bram majan ladat hte sa gap kau da ai lam shiga na chye lu ai. Si hkala shiga rai nchye lu shi ai.

14/ 5/ 2015 Ya Shani Na Lu Ai Hkyak Hkyak Myen Hpyen Shiga

Ya yang majan laja lana byin nga ai Man Maw ginwang, Man Je Ninghtawn, K.I.A Dap Dung (12) ginra hte Dap Dung (27) ginra, Nam Ling Pa makau grupyin hte Manmaw- Kaihtik lam mayan na tinang K.I.A dap ni hpe wang matep tawn nna atsai awai gasat shamyit kau na matu Jinghpaw Mung M.P.Hk myen Dap Daju kaw nna matsun dat sai lam shiga na chye lu ai. Tinang KIA Dap hku nna mung laja lana hkyen shajin let tai hpyen ni hpe mai byin ai made atsam htum hkra ninghkap gasat na matu jin jin rai nga sai lam shiga na chye lu ai.

Dai majaw Ndai ginra ni hta majan grai laja wa sana re majaw makam masham hpung shagu na Nu, Wa, hpung myit su ji nban yawng shani shana nhkring nsa ja ja akyu hpyi ya nga ga ngu saw lajin dat ai. 

K.I.A Masat (38) Dap Dung, Bang Satai, Bang Gaw Bum Lagaw Kaw Laja Lana Gasat

13/ 5/ 2015 ya shani lahta Sam Mung K.I.A Masat (6) Dap Ba, Masat (38) Dap Dung ginra, Bang Satai, Bang Gaw Bum lagaw kaw Myen dap Tat.M-(88) npu na hpyen hpung n-gun (140) ram hte tinang KIA Dap Dung (9, 29, 36, 38) pawng hpawm hpyen hpung ni hte jahpawt 8:40am ten kaw nna 10:50am ten daram du hkra gasat poi laja lana byin ai lam shiga na chye lu ai.

Ndai gasat poi hta Mye dap maga na jahpan tup hkrak nchye lu tim marai (20) lahta de si hkala hkrum na re nga nna dai majan kaw lawm ai KIA Du langai shana la ai kawn na chye lu ai. Ya yang K.I.A Dap Dung (36, 38, 9) ginra ni hta shani shagu majan grau grau laja wa nga ai majaw aja awa akyu jawm hpyi ya nga ga ngu saw lajin dat ai.

K.I.A Dap Dung (38) Ginra Kaw Gasat Nga

4/ 5/ 2015 ya jahpawt K.I.A Masat (6) Dap Ba, Dap Dung (38) ginra, Hpawng Seng, Loi Seng Bum kaw du nga ai mying nchye shi ai myen hpyen hpung ni hpe tinang K.I.A hpyen hpung ni wang matep tawn da nna laja lana gasat poi byin nga ai lam na chye lu ai. Dai hpyen hpung ni hpe wa hkye la na matu Bang Sai maga hku nna htim lung wa ai myen hpyen modo hpung hpe tinang K.I.A ni "Mung Lung Hkyet" kaw 7:00am ten daram hta hkap tau gasat nga ai lam nachye lu ai. Myen dap maga na grai sum machyi nga sai lam matut na chye lu ai.

K.I.A Dap Dung (38), Bang Satai Kaw Laja Lana Gasat, Myen Dap Si Hkala Law

12/ 5/ 2015 ya shani 3:30pm ten kaw nna 4:00pm ten du hkra lahta Sam Mung tinang K.I.A Masat (38) Dap Dung ginra, Bang Satai kaw mying nchye shi ai Myen dap hpyen hpung langai hte tinang KIA Dap Dung (9, 36, 38) pawng hpawm hpyen hpung ni laja lana gasat poi byin ai lam shiga na chye lu ai. Gasat poi hta Myen mang (9) hte myen sinat hte machyu pala nkau lu zing la ai lam na chye lu ai. Tinang KIA ni laja lana hpa n'byin ai lam shiga matut na chye lu ai.

Theme: Fresh Print by BlogBaker. Powered by BlogBaker.